Agt plaasaanvalle, twee plaasmoorde in ses dae

24Oct - by SA Genocide - 0 - In AfriForum Hoofnuus plaasaanvalle SA-nuus

Joubert Conradie (links) en Kyle Stols.

Die burgerregte-organisasie AfriForum gaan Woensdag sy syfers vir plaasaanvalle en plaasmoorde sedert die begin van 2017 bekend maak.

Dít volg nadat agt plaasaanvalle sedert Vrydag plaasgevind het, wat tot die dood van twee mans, Kyle Stols (21) en Joubert Conradie (47), gelei het.

Stols was die voorman op ’n wildsplaas naby Jagersfontein in die Vrystaat. Hy is Sondag vermoor. Conradie, ’n boer van die Klapmuts-omgewing buite Stellenbosch in die Wes-Kaap, is Dinsdagoggend tydens ’n plaasaanval vermoor.

“Vanjaar sal die sesde agtereenvolgende jaar wees waarin ons syfers ’n styging in plaasaanvalle en -moorde aandui,” sê Ernst Roets, adjunk- uitvoerende hoof van AfriForum. “Daar is tot dusver in 2017 reeds meer moorde tydens plaasaanvalle gepleeg as die totale syfer vir 2016.”

Roets het aan Maroela Media gesê AfriForum sowel as TLU SA hou hul eie statistieke oor plaasaanvalle en -moorde nadat die regering in 2007 bekend gemaak het dat geen verdere statistiek daarvan ingesamel gaan word nie. Die twee organisasies het hul eie afsonderlike databasisse wat hulle deurlopend vergelyk.

Gawie Stols, Kyle se broer, gaan die bekendstelling bywoon om te vertel hoe die familie en gemeenskap deur sy broer se moord geruk is.