Boer (65) beseer in nóg ʼn plaasaanval

24Oct - by SA Genocide - 0 - In Hoofnuus Mpumalanga plaasaanvalle SA-nuus

Argieffoto: Reint Dykema

ʼn 65-jarige boer van die Madola-distrik in Piet Retief in Mpumalanga is Maandagaand in ʼn plaasaanval beseer.

Joe Filter, veiligheidsvoorsitter van georganiseerde landbou vir Agri in dié distrik, sê die boer, intussen geïdentifiseer as David Kreaynouw, en sy gesin is buite gevaar.

Volgens Filter het die boer Maandag omstreeks 19:00 na sy huis teruggekeer nadat hy ʼn brand by ʼn boomplantasie laat blus het.

Kreaynouw is na buite om ondersoek in te stel toe sy honde geblaf het.

“Die verdagtes het toe op hom geskiet, waarna hy in die kop beseer is. Die koeël het verby hom geskuur en gelukkig net geringe skade aan sy kop veroorsaak. Alle tekens dui daarop dat hulle van ʼn ver afstand moes afgevuur het,” sê hy.

Kreaynouw het daarna die huis ingehardloop waarna sy vrou die bure gebel het. Die polisie en plaaslike buurtwagte is na die toneel ontbied.

“Die verdagtes het op die vlug geslaan en dus nie toegang tot die huis verkry nie. Niemand anders is in die voorval beseer nie. Ons het die gebied saam met die polisie tot voor middernag gefynkam, maar kon nie daarin slaag om iemand vas te trek nie,” sê hy.

ʼn Dokter is na die plaas ontbied waarna hy die boer ondersoek en behandel het. Volgens Filter was dit nie nodig om Kreaynouw na ʼn hospitaal te neem nie.

Filter het die belangrikheid van ʼn buurtwag beklemtoon. “Ons weet die boere wil graag boer – dit is hulle passie en dis waarom hulle op die plase is. Maar dis ongelooflik belangrik om jou by die netwerk aan te sluit sodat ons mekaar kan help en bystaan in gevalle soos dié.”

ʼn Ondersoek is deur die polisie begin. Filter sê die polisie se speurdiens keer Dinsdag terug na die toneel om die ondersoek voort te sit.